Rev 2 | MED | STEP | Episis kona peng ou ila, Got nga rapa tenda wamp kᵾⱡ nga anggelo ei kᵾn, mon ei rokᵾn ngui! Mipil 7 ki mbo orunga ambuⱡpa, wote gol lam 7 kiya nomba morum kᵾⱡ nga ruk ting ila andpa morum wu ei ndi, ik ei mel nimba mundnᵾm.

Revelation of John 2

Episis Kona Peng Ou Ila, Got Nga Rapa Tenda Wamp Kᵾⱡ Kᵾn, Mon Ei, Rokᵾn Ngui

1 Episis kona peng ou ila, Got nga rapa tenda wamp kᵾⱡ nga anggelo ei kᵾn, mon ei rokᵾn ngui! Mipil 7 ki mbo orunga ambuⱡpa, wote gol lam 7 kiya nomba morum kᵾⱡ nga ruk ting ila andpa morum wu ei ndi, ik ei mel nimba mundnᵾm. 2 Nim nga kongun etᵾn uⱡ mbᵾ kep, wote kongun etkᵾn mbun mbᵾ orum ei kᵾn, ndoimp rokᵾn morᵾn uⱡ ei, nanim pilip mor. Wote, uⱡ kit etmin wamp mbᵾ kandkᵾn, kui iti natkᵾn, nombuⱡa rung wamp mul kᵾmp ralk ik kep, nok andᵾrmᵾn mbᵾ nga puⱡ ei, kombulkᵾn kandrᵾn uⱡ ei na pilip mor. 3 Na nga mbi ila mbun orum ei kᵾn, ronduⱡ pukᵾn, enimp kuⱡi nalkᵾn, kongun etkᵾn morᵾn uⱡ ei, nanim kandᵾp mor.

4 Wote, uⱡ ti mint, na nim kᵾn kant kapⱡa iti natᵾnᵾm ei, nim unt kokila ei kᵾn, na numan ngurun uⱡ ni, akup wak ron. 5 Nim uⱡ kit mbila mana purum ei mel, tᵾkᵾn mendkᵾn numan ropᵾl rokᵾn, kalkᵾn, unt kuimp tekᵾn itin, ni mel iti! Muna numan ropᵾl rui nᵾrᵾn ndam, na ndi, nim nga lam morum ei omp timp. 6 Wote, uⱡ ti kapⱡa en ei, Nikolaus wamp kᵾⱡ nga uⱡ etmin. Na numan ngui nganggᵾr ei mel ku, nim i ku etᵾn.

7 Wote, wamp nam ti ndi, kum nombuⱡa tem ndam, Muⱡnga ei ndi, elim nga rapa tenda wamp kᵾⱡ kundpa nᵾnᵾm ik ei pilangga! Wamp nam ti, el etpa int pendᵾm wamp ei, Got nga pana ila, kont mba mul nde ei nga mong ei, kapⱡa tᵾpa nangga nimp.

Smerna Kona Ila, Got Nga Rapa Tenda Wamp Kᵾⱡ Kᵾn, Mon Ei Mel Rokᵾn Ngui

8 Wote, Smerna kona ila Got nga rapa tenda wamp kᵾⱡ nga anggelo morum ei kᵾn, mon ei mel, rokᵾn ngui! Puⱡ mundi uⱡ mbᵾ nga kep, wote etpa pora ndui uⱡ mbᵾ nga kep morum. Wu ei, unt kurum, wote aldpa ⱡoporpa kont murum ei ndi, nombuⱡa rung ik ei mel nimba mundnᵾm. 9 Nim mbun mindil mbᵾ tᵾkᵾn, wote ya mᵾi kona mel mbᵾ nga kurpa norum uⱡ ei, na pilip mor. Wote, mul kona mel mbᵾ nga nim nuim morᵾn. Wamp mat, en enim Jura wamp mon mbᵾ ndi, ik kep nok, Jura wamp mormun nᵾk, nim kᵾn ik kit mbᵾ nᵾtmin ei, na pilip mor. Wamp mbᵾ, Seitan nga rᵾⱡaip ila mormᵾn. 10 Nim nondpa mbun kandᵾk tin en ei nga, mundmong iti nᵾti! Pin ei, kur kit Seitan ei ndi, nim oⱡa tᵾpa kanᵾmba pilpa, enim wamp mat ropa, kan manga ila mundangga, ila mbun mindil mbᵾ, tᵾk piyangina rumbᵾⱡ 10 omba mba. Wote, ui ei kᵾn, wamp kuⱡi uⱡ ei, nim kᵾn om ndam, nim na kᵾn mondᵾk pᵾtᵾn uⱡ ei, wak rui nᵾri! Nim ronduⱡ mundkᵾn muⱡana, nim uⱡ nga kᵾnt nga kont mul uⱡ kai ei, punt rop nguimp.

11 Nim wamp nam ti ndi, kum nombuⱡa tem ndam, Muⱡnga ei ndi, elim nga rapa tenda wamp kᵾⱡ kᵾn ninim ik ei pilᵾi! El etpa int pendᵾm wamp ti, uⱡ nga kᵾnt nga wamp kuⱡi uⱡ ei ndi, etpa kit mundi namᵾndᵾmba mon!

Pergamum Kona Ila Got Nga Rapa Tenda Wamp Kᵾⱡ Kᵾn, Mon Ei Mel Rokᵾn Ngui

12 Wote, Pergamum kona ila, Got nga rapa tenda wamp kᵾⱡ nga anggelo morum ei kᵾn, mon ei mel rokᵾn ngui! Wu ti koiya mbuldung oldung raⱡ nengina norum, tepa morum wu ei ndi, nombuⱡa rung ik kᵾⱡ nimba mundnᵾm. 13 Nim Seitan nga ronduⱡ ei nga rᵾpᵾndi pol ila morᵾn ei, na pilip mor. Wote, Seitan morum kona ila, na nga mondpa pili wu Andipas rok kondrung. Ei kᵾn, nim na kᵾn mondkᵾn pᵾtᵾn uⱡ ei, wak rui nᵾrᵾrᵾn. Nim ndi, na nga mbi ei, ambulkᵾn gi ndukᵾn murᵾn mint.

14 Wote, nim kᵾn uⱡ mat kant, kapⱡa iti natᵾnᵾm ei. Nim morᵾn kona ei nga ruk ting ila, Beilam ni, wu ei nga ik mbo endᵾtᵾm mbᵾ nga pep rormin wamp mat mormin. Unt Beilam ni, wu ei ndi, Isrel wamp mbᵾ uⱡ kit ila mana peing nimba, Beilak mbo endpa, kur atinga rok rᵾng ngurung mbᵾ nok, wote wapra rok iteing nitim ei mel etᵾng. 15 Ei mel ku, nim morᵾn ruk ting ila, Nikolaus wamp rᵾⱡaip mbᵾ nga ik mbo endᵾtmᵾn mbᵾ, ambulk gi ndurmin wamp mat mormin ku. 16 Akup nim numan ropᵾl rui! Muna ei mel iti nᵾtᵾn ndam, na ndi, ui nondpa tila omp, na nga keta ila koiya ekit om ei ndi, wamp mbᵾ kᵾn el ruimp.

17 Nim kum nombuⱡa tem ndam, Muⱡnga ei ndi, Got nga rapa tenda wamp kᵾⱡ kundpa ninim ik ei pili! El etpa int pendᵾm wamp ei kᵾn, muⱡ ila rᵾng, ‘mana,’ nᵾtmᵾn ei nga mat, mo ropa pinditim nimbᵾ tᵾp nguimp. Wote, ku kurmuⱡa ti, tᵾp nguimp ku. Ku ila mbi kont ti, rok munding ei, wamp elpa ti ndi, pili napilmba. Ku ei tᵾm wamp ei ndi, mendpᵾⱡ pilmba.

Taiyataira Kona Ila, Got Nga Rapa Tenda Wamp Kᵾⱡ Kᵾn, Ik Ei Mel Rokᵾn Ngui

18 Wote, Taiyataira kona ila Got nga rapa tenda wamp kᵾⱡ nga anggelo morum ei kᵾn, mon ei mel rokᵾn ngui! Got nga Kangᵾm, wu ei nga mong raⱡ ndip anmbil mel kapⱡa, wote kᵾmp raⱡ ku bras mel, eng nomba tetᵾm wu ei kᵾn, nombuⱡa rung ik ei onum. 19 Nim nga kongun en uⱡ mbᵾ, na pilip mor. Ei nim nga wamp numan ngui uⱡ ei kep, nim nga mondpa pili ei kᵾn, wamp tᵾpa rᵾpᵾndi uⱡ ei kᵾn, mbun mbila ronduⱡ pukᵾn morᵾn uⱡ mbᵾ kᵾn, uⱡ mbᵾ mel unt kel etkᵾn itin ni, akup elina, mam enim ei, na pilip mor.

20 Wote, uⱡ ti mint nim kᵾn kant kapⱡa iti natᵾnᵾm. Ei amp Jesipel kandkᵾn kui elina, nim kᵾn morum. Amp ei ndi, elim pai nui amp ti nimba, na nga kongun kindmant wamp mbᵾ tᵾpa, tiki ponduⱡnga wapra rok, kor atinga rok rᵾng ngormin mbᵾ nᵾi nimba, mbo endᵾtᵾm. 21 Amp ei, numan ropᵾl rangga, nᵾmp ui kanggᵾp ambᵾⱡᵾp ngur. Ei wote, elim nga wapra rorum uⱡ mbila, numan ropᵾl rui narᵾrᵾm. 22 Ei nga, amp ei tᵾp ur pi kona ila pindamba, amp ei kᵾn ok, wapra rormᵾn wu mbᵾ, amp ei nga mindil nom uⱡ mbᵾ oⱡᵾmp, tᵾk mindil kit nuing. Ei kᵾn, wu mbᵾ amp ei kᵾn, wapra rormin uⱡ mbᵾ nga numan rop rui narᵾng ndam, mindil kit nᵾnt ei, akup ting. Ei kᵾn, na ndi, en enim nga kangambuⱡa mbᵾ rop kundamba kᵾn, Got nga, rapa tenda wamp molk purmᵾn mbᵾ ndi, na ndi, wamp mbᵾ nga numan rukᵾr orunga petᵾm uⱡ mbᵾ pora kandᵾp, pilip et wu ei, nᵾk piling. Enim nga uⱡ etmin mbᵾ mel, kandᵾp punt rop elpa elpa nguimp. 24 Wote, enim Taiyataira kona ila wamp mat, uⱡ kit mbᵾ nga mbo endᵾtmᵾn mbᵾ, ambulk gi ndui nandᵾrmᵾn. Wote, enim wamp mat ndi, Seitan nga uⱡ mo ropa mat petᵾm nᵾtmin uⱡ mbᵾ, pilik ti natᵾk etmin. Wamp mbᵾ kᵾn, uⱡ mat etᵾp mundmong mindil kundi nᵾkᵾndimp nᵾnt. 25 Wote, enim nga mondpa pili uⱡ ei, ambulk gi nduk muⱡangina mba, na yant unt ui ei kᵾn, kapⱡa itangga.

26 Wamp nam ti, el etpa int pendpa, na nga kongun mbᵾ ronduⱡ mundpa etpa muⱡangga, ui ei pora nim ndam, wamp ei, na nga Wuta ei ndi, na ronduⱡ ngurum ei ngamba kᵾn, wamp rᵾⱡaip elpa elpa mbᵾ rup etmba. Wote, wamp ei ndi, tᵾmbᵾⱡ pᵾiya ronduⱡ ti ambuⱡpa moⱡpa, wamp rᵾⱡaip mbᵾ rᵾp etpa, tᵾmbᵾⱡ ei ndi rangga, mᵾi ming na ni mel, gurᵾk kel kel iting. Uⱡ ei, na nga Wuta kᵾn ronduⱡ ei tit, ei mel ting. 28 Wote, kona rangᵾmba etpa kᵾn, mipil kiya norum ei, wamp ei nguimp. 29 Wamp nam ti, kum nombuⱡa tem ei ndi, Muⱡnga ei ndi, Got nga rapa tenda wamp kᵾⱡ, kundpa ninim ik ei pilangga!